خراج الثدى

تعالوا النهاردة نصحح معلومة غلط كلنا بنقع فيها وهى عندنا مقولة مأثورة دايما نسمعها كتيير؟؟؟ ( اصبر على الخراج لحد ما يستوى وبعدين روح افتحه) ، الخراج لما يستوى يعنى يبقى طرى وملمسه ناعم، وده معناه انه مليان صديد...
الكلام ده صح لكن مش مع كل أنواع الخراريج.
خراج الثدى من أشهر أنواع الخراريج اللى لازم تتنظف جراحيا فورا بمجرد ظهورها ومفيش حاجة اسمها انتظرى لحد ما يستوى.
طيب ليه؟؟؟؟؟وازاى الست تعرف ان عندها خراج ثدى؟؟؟؟
جزء من صدرها هيبقى لونه احمر ،وصدرها بيتنفخ وبيوجع وبالليل مش عارفة تنام خالص وحرارتها فوق الأربعين وبيكون فيه ألم شديد خاصة بالليل ، عشان الجهاز العصبى إللى بيشتغل بالليل وهو الباراسيمبثاوى بيعمل توسيع للاوعية الدموية فبيكون فيه فرصة ان الدم يسحب شوية من السموم اللى بتفرزها الميكروبات اللى فى الخراج وتروح الدورة الدموية وبالتالى ترفع درجة الحرارة والست تحس بألم فظيع.
الست دى الحل انها تنظف الخراج جراحيا بسرعة وبعد كدا تاخد مضادات حيوية ،
ولكن الخطأ اللى بيحصل انها تاخد مضادات حيوية وتنتظر فى الحالة دى الخراج مش بيخف ومش بتتحسن اطلاقا، ولو صبرت لحد الخراج ما يستوى، الخراج بيكبر ف الحجم وفى الحالة دى لما يتنظف بيكون الصديد فى كل الثدى ويحتاج وقت كبير بعد التنظيف عشان يخف وبيكون منظر الثدى مش لطيف خالص .
صباحكم كل صحة وعافية.