كل الأنواع الفاكهة بترفع سكر الدم
مساء النور على كل أعضاء أسرة الفيروز.
كنا سألنا سؤال عن أيه أخطر أنواع الفاكهة إللى ترفع السكر ف الدم لمريض السكر.
فى البداية وعشان نكون عارفين مفيش فاكهة مش بترفع سكر الدم
كل الأنواع الفاكهة بترفع سكر الدم ؟
طيب أيه العمل ؟؟؟!!!
لازم نفهم أن كل حاجة ليها قواعد ومقاييس بنستخدمها، وده علم مش إجتهاد لا مننا ولا منكم.
فيه حاجة بنقيس بيها زى المسطرة اسمها المؤشر الجلايسيمى(glycemic index) لكل المأكولات.
يعنى ايه الكلام الكبير ده ؟؟!!
ببساطة كدا هو مؤشر بيقيس سرعة ارتفاع السكر ف الدم ، وبالتالى فيه فاكهة بترفع السكر بسرعة ف اقل من ساعة ودى بنقول عليها انها ذات مؤشر جلايسيمى عالى وبتكون فوق معدل 70 , وده عشان بتمتص بسرعة من الأمعاء
وفيه فاكهة بترفع سكر الدم ببطء يعنى ممكن توصل لاكتر من ساعتين ودى بنقول عليها ذات مؤشر جلايسيمى منخفض يعنى أقل من 55.عشان امتصاصها بيكون بطىء.
انتوا لسا معانا ؟؟؟ ولا كلام ممل؟؟؟
طيب سؤال بسيط .أيه السبب ف سرعة الامتصاص؟
خدوها قاعدة الفاكهة إللى مفيش فيها ألياف بتكون سريعة الإمتصاص وتتهضم بسرعة وبالتالى توصل الدم بسرعة وكدا السكر يعلى ف مدة لا تزيد عن 30 إلى 45 دقيقة من بداية الأكل..أما إللى فيها ألياف بيكون الهضم بتاعها بطيء ومش بتوصل الدم بسرعة .فسكر الدم بيزيد زيادة تدريجية ومستقرة وبالتالى تتناسب مع عمل الأنسولين إللى بيطلع من البنكرياس بتاع حضرتك .
طيب يلا ممكن كدا نجرب نسأل السؤال مرة تانية ومنتظرين اجاباتكم ..
الأناناس.. التين...البلح ...الفراولة...التفاح...المانجو ...المشمش ....
البطيخ... الشمام...
ياترى مين فيهم أعلى فى المؤشر الجلايسيمى؟؟ ومين يرفع السكر بسرعة ؟؟؟
تعليقات
إرسال تعليق