الحمل خارج الرحم (ectopic pregnancy ) - المشيمة المتقدمة(placenta previa)
احنا النهاردة هنكمل كلامنا عن الحمل خارج الرحم والمشيمة المتقدمة ...
يلا بينا نعرف ازاى بتحصل القصة دى..
كلنا عارفين إن البويضة لما تخرج من المبيض بتلتقطها إهداب قناة فالوب وتفضل عايشة لمدة 24 ساعة ف إنتظار حيوان منوى عشان يحصل التلقيح والإخصاب وبتكون ال (Zygot ) وهى اول مراحل تكوين البيبى. و بعد ما يتكون الزيجوت يفضل محبوس داخل الانبوبة لمدة 3 ايام ويتغذى على حاجة بيسموها لبن الأنبوبة (Tubal milk) ، بعد كدا يتم الإفراج عن الزيجوت ويخرج ويسبح ف الرحم لمدة 3 أيام أخرى ، وبرضو ويتغذى ع حاجة أسمها لبن الرحم (Decidual milk) .
كدا تقريبا الزيجوت فضل حر الحركة لمدة 6 أيام ، يجى ف اليوم السابع ويحصل حاجة اسمها التعشيش ويتزرع ف بطانة الرحم .
طيب إزاى الزيجوت ده بيفضل كدا 6 أيام من غير ما ينغرس ف بطانة الرحم ، السبب أنه بيكون محاط بطبقة مغلفة أسمها (Zona Pellucida) وطول ما الطبقة دى موجودة مش بيحصل انغراس للبيبى.
بس لو الطبقة دى اختفت وساحت بيخرج من الزيجوت حاجة زى الأذرع ودى بتتشعبط ف بطانة الرحم ويحصل الإنغراس(Implantation ) .
لحد كدا أكيد فهمنا إللى بيحصل ...
طيب لو فرضنا حصل خطأ والطبقة دى ساحت واختفت بدرى ، ساعتها الأذرع دى تخرج وتتشعبط فى جدار أنبوبة فالوب مش بطانة الرحم ، وكدا يحصل الحمل خارج الرحم.
طيب تعالوا نفترض العكس وإن الطبقة دى ساحت واختفت متأخر اوى ، كدا بيكون الزيجوت بيسبح جوه الرحم ويوصل لمسافات بعيدة اوى اووى قرب منطقة أسفل الرحم وساعتها لما تخرج الأذرع تتشعبط ف بطانة الرحم ولكن فى الجزء السفلى ، وده معناه ان المشيمة (Placenta ) هتتكون تحت ف أسفل الرحم ، وكدا هتغطى عنق الرحم جزئيا أو كليا بيسموها مشيمة متقدمة او منزاحة(Placenta Previa) .
وفى الحالة دى لما يقرب وقت الولادة ويجى الرحم يفتح وينقبض عشان البيبى ينزل ، تقوم المشيمة إللى ف مكان غلط ومغطية عنق الرحم تنفصل عن عنق الرحم وتتقطع وتتمزع ويحصل نزيف جامد اووى ، وممكن لا قدر الله الحامل تفقد حياتها ولازم يحصل تدخل سريع وعمل ولادة قيصرية ونقل دم كمان..
يبقى كدا نفهم أن الزيجوت لازم ينغرس ف اليوم السابع .
لو أتى بدرى عن ميعاده يحصل حمل خارج الرحم .
ولو أتى متأخر عن ميعاده يحصل مشيمة متقدمة .
والحالتين دول ما ليهم إلا التدخل الجراحى السريع والا هيحصل نزيف جامد وممكن تروح الحامل فيها .
صباحكم كله بركة ...وربنا يحفظ الجميع ..
الفريق الإعلامى لمركز الفيروز يأمل مشاركة هذه البوستات لأهميتها والا تكتفى بالمشاهدة ، ربما بمشاركتك المنشور تكون سبب ف إنقاذ حياة إنسان..
تعليقات
إرسال تعليق