الحمل خارج الرحم (ectopic pregnancy ) - المشيمة المتقدمة(placenta previa)

 احنا زى ما وعدناكم أن نكمل كلامنا عن الحمل خارج الرحم (ectopic pregnancy ) وعن المشيمة المتقدمة(placenta previa ) .

بص بقى ومن غير مقدمات هندخل ف الموضوع ع طول .

ف البداية احنا ليه مهتمين بالموضوع ده بالخصوص ، تعرفوا ايه السبب لان دول من اكتر الحاجات الكارثية إللى ممكن يتعرض ليها دكتور النسا وكمان الست الحامل .

لو الحامل ما لحقناها واتصرفنا بسرعة ممكن تروح ف شربة مية ولا قدر الله تفقد حياتها ، لأنها بتسبب نزيف جامد اوووى ..

الحمل خارج الرحم يعنى البويضة بعد ما يحصلها تلقيح ف قناة فالوب ودى قناة ضيقة اووى مفروض تنزل مكانها الطبيعى وهو الرحم ، لكن مش بيحصل كدا وده لأسباب هنتكلم عنها ف البوست الجاى وبتتحبس ف المكان الضيق ده ، طبعا الجنين بيكبر ف حته ضيقة ، بيحصل انفجار ف قناة فالوب ويحصل نزيف داخلى كتير وممكن الحامل تموت.

اما بالنسبة للمشيمة المتقدمة البويضة الملقحة إللى هى البيبى بيمشى مسافة اكتر من اللازم فى الرحم ويوصل قريب من أسفل الرحم ، فتكون المشيمة قريبة من عنق الرحم وأثناء الولادة ينقبض الرحم عشان ينزل البيبى لكن المشيمة بتكون حاجز بينه وبين النزول ، العضلات بتاعت الرحم تنقبض بشدة ،المشيمة تتقطع وتتمزع والحامل تنزف كتير لدرجة انها ممكن تروح فيها لو ما حصل تدخل سريع بإجراء القيصرية ونقل الدم ..

اكيد كدا فهمتم السبب ف خطورة الحالتين دول ..

البوست الجاى هنتكلم ازاى بيحصل كدا وازاى بيتم تشخيص الحالات دى ،عشان نكون مستعدين كأطباء ويتاخد القرار الصح وف الوقت الصح ..

وربنا ينجى ويحفظ كل ست حامل .

نشوفكم ف البوست الجاى ...انتظرونا .

واوعوا تنسوا تعملوا مشاركة البوست ومتابعة .

وصباحكم كله صحة وسلامة.

#مركز_الفيروز_الطبى